IEO Edicions
Le trésor des mots d'un village occitan
ISBN : 2859104062
390 pages
25.00 €
André LAGARDE
Le trésor des mots d’un village occitan
" Es aquí que m’avisèri que deviái un brave mercé. Òc ! un grand mercé pel privilègi d’èstre lo prumièr a trepar l’òrt de paradís que la clau me n’èra balhada. Comencèri la prumièra pagina. Un còp legida, la virèri ; puèi la segonda. Legiguèri tot atal, d’una tirada, sense una pausa per polsar. Acabèri plan tard, dins lo silenci de la nuèit. Diccionaris n’ai a l’ostal, mai d’un, de fòrças lengas. I boti sovent lo nas dedins. M’èra pas jamai arribat de ne legir un, d’un cap a l’autre, sense m’aturar. Lo libre barrat, comprenguèri lèu çò que m’aviá embelinat. Veniái de tornar trobar la granda paraula dels contaires nòstres, lor quite buf e n’aviái los ausidors bategants.

D’unis pensaràn benlèu que l’autor s’es embarrat entre Lavelhanet e Quilhan, a l’ombra del cloquièr de Santa Ceselha. Los convidi a i anar veire de prèp. S’avisaràn lèu que la lenga del diccionari es d’occitan de bona raça, de bon compréner, fin finala la lenga de totis.

Un trabalh seriós, menimós qu’es una font per abeurar totis los Occitans assedats de bona lenga, ambe çò que cal dins l’aiga de sal pirenenca per mercar que raja al pè del Plantaurèl. Posatz ! Tastatz ! Vòstra lenga se desligarà lèu, pel plaser de totis."
(Prefaci de Felip Carbona)

Andrieu Lagarda s’interessèt plan jove a l’occitan e amb qualques camaradas de licèu creèt l’Académie patoise. Puèi foguèt regent dins l’airal tolosan abans de venir professor de letras e d’espanhòl a Carbona. Son trabalh constant per l’occitan lo portèt a integrar la lenga dins sos corses en s’inspirar del metòde Freinet e de l’experiéncia d’Antonin Perbòsc. A agut una activitat intensa dins lo domeni de la lexicografia occitana amb la publicacion del Vocabulari occitan (1971), puèi en 1991 d’una òbra de vocabulari mai local Le trésor des mots d’un village occitan (sul parlar de Rivelh) e del diccionari bilingue occitan-francés/francés-occitan la Palanqueta (1998).

Es president fondador del Centre Regional dels Ensenhaires d’Occitan (creat en 1964). Foguèt president de l’Escòla Occitana e a mai conselhièr academic e responsable de formacion. Durant mai de trenta ans publiquèt dins la Dépêche du Midi una cronica d’Actualitat occitana qu’èra plan apreciada e seguida. Tanben collaborèt a la produccion de programas de ràdio e de television. Es membre onorari de l’Acadèmia Occitana-Consistòri del Gai Saber.

Es lo paire de l’occitanista e ispanista Crestian Lagarda.

Réalisation : William Dodé - www.flibuste.net | Graphisme www.charlottelambert.net | IEO Difusion - IEO/IDECO - ZA plaine St-Martin - 81700 Puylaurens Remonter Repojar