Aqueste obratge, majoritariament escrit en 2021, prepausa una garba de tèxtes sus una tematica qu’es lo camp lexical de las bóstias. Se tracha pas d’un recampament a posteriori d’òbras qu’òm se maina de lor punt comun mas d’una experiéncia d’escritura a constrencha prealabla sens cap de limita de las variacions possiblas. Balha de tèxtes de tota mena, de tota dimension, de tota tonalitat, de l’umorisme a la tragedia, de la poësia al fantastic. Dins la darrièra istòria, Lo Sòmi d’Ipocrates, la situacion contemporanèa evocada, la del Covid, ven premonitòria e lèu – qual sap ? – la ficcion poiriá èsser confortada o trespassada per l’anar del mond.