Jan dau Melhau es un autor-contaire-editor-chantaire-musician lemosin. Nascut a Limòtges en 1948, fuguet un daus principaus reviscolaires de la chançon occitana de las annadas 1970-1980.

Mas sa lemosinitat, qu’es a dire son biais de veire e de viure las chausas, la natura, las bèstias, los òmes e la mòrt ne’n faguet un pauc un chantaire marginau. Laidonc aguet pas lo succès, la reconeissença mediatica coma Joan-Pau Verdier o dengueras Claudi Martí e Patric, mas Melhau zo cherchava pas, zo desirava pas. S’era desjà, a quela epòca, retirat dins la prunda campanha lemosina ente s’es mai inspirat de la natura, dau monde que li vivián e de lors misteris que de las revòutas e luchas ciutadanas o panoccitanas…

Autor e editor de belas letras lemosinas (coma Marcela Delpastre o Pau-Loís Granier), eu s’interessa a la beutat de la lenga subretot, a sa fòrça literària. Sa demarcha es pas jamai estat de far de folclorisme ni de chantar davant un plen Zenith, mas de ’nar fossinar au mai prund de la lenga occitana tota sa finesa, tota sa complexitat. Contunha auei d’obrar per lo lemosin emb son ostau d’edicion Lo Chamin de Sent Jaume (Meusac) e sos espectacles de contes e de chançons.