« Cossí li disián ? Jòrgi, Augustin, Carles-Enric, Domenge, Abèl, o benlèu totes aquestes acampats o encara d’autres noms ? O sabèm pas tròp. De tot biais, de la baia de San Francisco al lac Baikal, de las mars d’Arabia entrò los golfes de Baltica, de dintre los pòbles de Corlanda als portugués de Clarmont, los viatges li avián fait rescontrar tant de monde disparièrs, de vestits briscalhats o afalits, de religions rigoristas o latitudinàrias, de manjars fins bòns o sens sabor, que se n’en conflèt la memòria e las sovenenças de ne’n podre pas mai cobrar. Pr’aquò, jamai s’assadolèt pas e totjorn se tenguèt prèst per s’anar abeurar a de las fònts desconeissudas coma de s’assabentar de paraulas novèlas o de rebombs de lònh. »